nova ĉefministro

Post la lastatempa politika malordo en Kimrio, finfine hodiaŭ io okazas. Ĉar la kontraŭantaj politikaj partioj ne sukcesis konsenti kunlabori, estos minoritata registaro de la Laborista Partio. Je la 13-a hodiaŭ, do, la Kimra Asembleo kunvenis por proponi ke la antaŭa Ĉefministro (Rhodri Morgan) denove estis la Ĉefministro.

Neniu kontraŭis la proponon kvankam la ĉefoj de la kontraŭantaj partioj (kiuj havis esperojn esti ĉefministroj ili mem) havis mienojn "kiel tondro" kiel ni diras en la angla (kiu signifas ke ili ŝajne furiozis!)

Nun la reĝino de Britio devas konsenti al la propono kaj ŝi venos al Kardifo la 5-an de junio oficiale malfermi la novan asemblean sesion.

Iuj kiuj interesas povas spekti la dankparoladon de la preskaŭ-ĉefministro ĉi tie. Estas en la anglaj kaj kimraj lingvoj, sed plej amuzas kiam la video-kamerao fokusigas sur la membroj de la aliaj partioj.

Zorgu, tamen! Mi avertas vin ke kelkaj asembleanoj portas tre aĉajn vestaĵojn : pri iliaj modaj malkapablecoj mi ne respondecas :-)

orkestra koncerto

Mi antaŭe menciis al vi ke Kolego 1 ĉe mia oficejo violonludas en orkestro. Venontan semajnon li vojaĝos kun la orkestro turnei en Bretonio. Ĉi-jare la orkestro festas sian 25-an datrevenon kaj do veturos al la ĉirkaŭaĵo de la urbo Nantes (ĝemelurbo de Kardifo) fari du koncertojn. Se iu blogleganto loĝas apude kaj ŝatus aŭskulti la orkestron, la detaloj estas jenaj:

• 29/05/2007, je 20.00 ĉe l'Amphithéâtre Westotel, La Chapelle-sur-Erdre (senkosta koncerto)
• 01/06/2007, je 20.30 ĉe Cité International des Congrès, Nantes - Métropole (biletoj haveblas de FNAC, Carrefour aŭ je 0892 58 36 22)

La programo inkluzivos Les Francs-Juges de Berlioz, La E-minora Simfonio por violono de Mendelssohn kaj la E-minora Dua Simfonio de Raĥmaninov. Violon-solistino estos Sara Trickey kiu jam ludis kun multaj konataj orkestroj. La konduktoro estos Michael Bell.

Kaj ne forgesu, ke Kolego 1 (en la violon-bloko) eĉ parolas iomete Esperanton!

politika ĥaoso

Politike ĥaosas ĉe ni en Kimrio. Antaŭ jam kelkaj semajnoj okazis voĉdonado por la Nacia Asembleo de Kimrio. Kvankam la Laborista Partio gajnis la plej multajn voĉdonojn, ili ne sukcesis gajni totalan majoritaton. Tio signifis ke ili ne senkontraŭo rajtis daŭre regi. Tial, la Laborista Partio serĉis asocion kun alia partio: unue kun la Liberala Demokratia Partio, kaj kiam tiu ne konsentis, kun la Kimra Naciisma Partio. Mardon, klariĝis ke tia asocio ne okazus.

Hieraŭ dum la tuta tago oni parolis pri tiel nomita "Ĉielarka Koalicio" inter la Liberalaj Demokratoj, la Kimraj Naciistoj kaj la Konservativoj kontraŭ la Laboristoj. Ĉi-matene ni lernas ke ankaŭ tiu iniciativo fiaskis ĉar nek la Lib-Dem-oj, nek la Naciistoj konsentas kunlabori kun Konservativoj...

Restas du eblecoj: aŭ la Laborista Partio daŭre regos kiel minoritata registaro; aŭ (sed decido ne fariĝas antaŭ la 30-a de majo) ni devos havi novan elektadon.

Ni vidos...

la urbo de Ŝekspiro

Nur 16km for de Warwick troviĝas Stratford-upon-Avon, la urbo plej konata ĉar tie naskiĝis la angla dramatisto Ŝekspiro [Shakespeare]. La ruĝbrika konstruaĵo en la suba bildo estas la Reĝa Ŝekspira Teatro.Dimanĉon, antaŭ ol revojaĝi al Kardifo, miaj gekuzoj kaj mi decidis viziti la urbon. Ni parkis la aŭton kaj unue iom promenadis laŭ la rivero Avon.Sur la rivero estas multegaj cignoj [cygnus olor] . La reĝo/reĝino de Britio tradicie rajte posedas ĉiujn nemarkitajn cignojn sur riveroj kaj lagoj en la lando (fakte nuntempe la reĝino nur prenas tiun rajton sur kelkaj riveroj). Vundi aŭ mortigi iun cignon estas kontraŭ la leĝo. Simile kiel ĉe Warwick, videblas multaj konstruaĵoj de la 16-a jarcento. Jen domo kun belaj ĝardenoj kiu nun estas muzeo. Tre imponaj estas la Almozulejoj de la Preĝeja Strato [Church Street]. Ili ankoraŭ provizas malmultekostan loĝadon por gemaljunuloj malriĉaj.Dum ni rigardis la almozuleajn domojn ni subite aŭskultis tamburojn. Post kelkaj minutoj, ĉirkaŭ la angulo venis blovorkestro sekvita de multaj geoficialuloj.
Ni eltrovis ke estis parado antaŭ ol inaŭguri la novan urbestron. Se oni volas ion trinki dum vojaĝo al Stratford, estas kompreneble multaj eblecoj. La trinkejo Garrick estas la plej malnova trinkejo de la urbo (ĝi datiĝas de la 14-a jarcento).Alia malnova hotelo estas la Falka Trinkejo [Falcon Hotel].
Ambaŭ lokoj estis plenaj, do ni elektis trinki kafon ĉe pli moderna kompanio, Costa kafejo.Fortikigita de kafeino (!) ni marŝis al la bela naskiĝloko de Ŝekspiro. Finfine, do estis agrabla semajnfino en Anglio.

Alia interesa urbo

Post nia matena ĉirkaŭpromenado en Warwick ni trafis aŭtobuson al la apuda urbo Leamington (plene nomita Royal [Reĝa] Leamington Spa). Interesis min ĉar dum tri jaroj mi iam loĝis en tiu urbo. Estas stranga reviziti urbon kiun oni bone konis post 13-jara intervalo. Preskaŭ ĉio aspektis same sed mi ne plu apartenis tie.
La ĉi-supra bildo montras la Urbodomo. Estas impona konstruaĵo en la ĉefstrato. En la jaro 1814 malfermiĝis la kuracbanejo loke de fonto kiu troviĝis en 1794. La urbo rapide konatiĝis kaj en 1838 la Reĝino Viktorino donis al la urbonomo la prefikson 'Reĝa'.
Ekster la urbodomo troviĝas statuo de la Reĝino Viktorino. Dum la dua mondmilito falis bombo tre apude kaj laŭdire la statuo moviĝis 2/3cm sur sia bazo, sed ne forfalis.

bela kastelo

Mi pasigis la pasintan semajnfinon ĉe la urbo Warwick en meza Anglio kune kun mia kuzino kaj ŝia edzo. Estas regiono kiun mi sufiĉe bone konas - antaŭ 17 jaroj mi studis ĉe la apuda universitato. Warwick estas bela urbeto kun longa historio. Plej konata eble estas la kastelo kiu originale datiĝas de la jaro 914 KE. La ŝtona kastelo estis konstruita inter la 12-aj kaj 18-aj jarcentoj.

En 1431 estis la tiutempa Grafo de Warwick kiu kontrolis la juĝadon kaj ekzekuton de Johana de Arko ĉe Rouen en Francio. Estas tre multekosta eniri la kastelon (£16 /€23 ) kaj ni ĉiuj jam antaŭe tion faris, do ni pasigis agrablan matenon ĉirkaŭpromenante la urbon.

En la mezo de Warwick estas la impona preĝejo de Sankta Mary. Ĝi fondiĝis en 1123 sed estis preskaŭ detruita pro fajro dum la 18-a jarcento kaj poste rekonstruita. Ankaŭ troviĝas multaj belaj konstruaĵoj kiuj datiĝas de la 16-a jarcento. Jen, do kelkaj bildoj:

Kolego 1 gajnis!

Por tiuj kiuj avide sekvas la rakonton pri nia enoficeja konkurseto rilate al la Eŭrovido Kantokonkurso (vidu sube), jen la rezulto. Kolego 1 gajnis!!! Ĝoje, do, li manĝas la ĉokoladan prezon. El 35 eblaj poentoj, Kolego 1 gajnis 11, mi gajnis 9 kaj Kolego 2 gajnis 8. Neniu el ni tri prognizis ke le serba kanto gajnus tamen.

Sufiĉo jam estas skribita alie pri 'politika voĉdonado' kaj ligitaj temoj. Mi nur diru ke mi feliĉis ke la brita kantaĉo ne gajnis, tiom malplaĉis al mi.

Jes, oni povas frustriĝi pro troa voĉdonado por 'geamikoj' anstataŭ por la kantoj mem. Eblas, tamen, tion flankenmeti kaj ĝui amuzigan kaj ekstravagancan vesperon...

Kiu gajnas en la Eŭrovido konkurso?

Antaŭ kelkaj tagoj mi blogis pri la Eŭrovido-kantokonkurso kaj klarigis pri la konkurseto kiun mi kun geamikoj faras en kiu ni klopodas antaŭdiri la gajnontojn. Nu, pasintan vesperon okazis la duon-finalo de la kantokonkurso. Post tio, mi povas raporti ke la poentoj estas jenaj: Mi - 4 poentoj Kolego 1 - 4 poentoj Kolego 2 - 3 poentoj Do, neniu el ni tre bone antaŭdiris. Hodiaŭ ni klopodas predikti la rezultojn por la morgaŭa finalo. Mia preferata kanto ĝis nun estas tiu de Hungario, kiun vi povas aŭdi ĉi tie.

Kiu gajnos la ĉokoladan prezon? Ĝis baldau...

Shut the gate! Fermu la ĝardenpordeton!

One of my rare bilingual posts to highlight the extent of my rage today! Unu el miaj maloftaj dulingvaj blogaĵoj substreki mian koleron hodiaŭ!

Ĉi-matene mi duondormante stumblis de mia lito dek minutoj pli frue ol kutime por havi la tempon iri voĉdoni (por voĉdonado al la Kimra Asembleo) antaŭ la laboro. Mi tuj iritiĝis denove trovi malbelaspektan broŝureton de la Liberala Demokratia partio sur la pord-tapiŝeto. Mi ne menciu la aparte naŭzigan rozkoloron, nek la malprofesian eldonadon. Mi ne menciu la preskaŭ senpolitikan enhavon. Kio plej kolerigis min en mia antaŭkafeina stato estis ke, kiel kutime, la lakeoj Lib-Dem-aj estis lasinte malfermita mian ĝardenporteton kaj ĝi laŭte klakfermadis pro la vento.

Stumbling bleary-eyed from my bed this morning, 10 minutes early to have time to vote before work, I was infuriated to find another tatty leaflet from the Lib Dems on the door-mat. Let's leave aside the particularly revolting shade of pink paper and the shoddy production. Let's leave aside the virtually policy-free ranting content. What really increased my irritation in my pre-caffeinated state was that, as usual, the Lib Dem lackeys had left the front gate wide open and clanging noisily in the wind.

Al la Liberalaj Demokratoj de Suda Kardifo kaj Penarth, vi estas la sola Partio kies liverantoj persiste montras tiom malbonmanieran malrespekton por mia propraĵo. Mi estu klara: kiam vi ne fermas la pordeton malantaŭ vi, fatraso enblovas de la strato (kiun via konsilantaro malofte purigas) kaj amasiĝas apud la pordo; senhejmaj hundoj (kiujn via konsilantaro ignoras) sordigas la etan, sed prizorgitan, ĝardenon.

Cardiff South & Penarth Lib Dems, you are the only party whose delivery people have been consistently discourteous enough to show such little respect for my property, so let me be clear: when you fail to close the gate behind you, litter from the streets which the Lib Dem council rarely clean collects in a large drift at the door; stray dogs, which the Lib Dem council ignores, foul the tiny, but cared-for, front garden.

Mi forĵetis la rozkoloraĉan broŝuraĉon en la fiŝtankon kaj forstampfis trovi kafon. Malmultvorte, supozeble ne la koleregon kiun vi deziris inciti en voĉdonarano je la mateno de la Elekto Tago.

I chucked the nasty pink flier in the fish tank and stomped off for coffee. In short, not, I suspect, the ire which you wish to provoke in the electorate on the morning of Election Day.

Eŭrovido-Kantokonkurso 2007

Ĉiun jaron, mi spektas la Eŭrovido-Kantokonkurson. Jes, estas multaj ĉiamaj debatoj politikaj, lingvaj, kulturaj pri tiu konkurso, tamen estas ankaŭ tre amuza vespero, plejparte por ni en Britio pro la angla-lingva komentario ĉiam farita de Terry Wogan. Dum la lastaj jaroj, miaj geamikoj kaj mi havas la kutimon fari konkurseton inter ni. Ne, ni ne kantas. Ni provas antaŭdiri kiuj konkursantoj gajnos la konkurson. Tiu el ni kiu plej akurate antaŭdiras, gajnas Mars Bar ĉokoladon.La finalo de la Eŭrovido-Kantokonkurso okazos sabaton la 12-an de majo. Aŭtomate kvalifikiĝos por la finalo la dek landoj kun la plej multo da poentoj en la konkurso pasintjare. Ankaŭ aŭtomate kvalifikiĝos la kvar landoj kiuj multmone subtenas la konkurson, t.e. Britio, Francio, Germanio kaj Hispanio. Por la finalo, do, ni jam scias ke konkursos:

Armenio
Bosnio-Hercegovino
Britio
Finnlando
Francio
Germanio
Grekio
Hispanio
Irlando
Litovio
Rumanio
Rusio
Svedio
Ukrajno.

Dek aliaj landoj partoprenos la finalon. Ili estos elektitaj el la 28 partoprenantoj de la duonfinalo kiu okazos ĵaŭdon la 10-an de majo. Tiuj partoprenantoj estos (laŭ la ordo laŭ kiu ili konkursos):

Ĉeĥio
Danio
Hungario
Malto
Respubliko de Makedonio
Estonio
Nederlando
Bulgario
Portugalio
Andoro
Belgio
Aŭstrio
Islando
Svislando
Slovenio
Pollando
Kroatio
Montenegro
Serbio
Albanio
Moldavio
Belorusio
Norvegio
Israelo
Kartvelio
Kipro

Hodiaŭ, do, miaj kunlaborantoj klopodas antaŭdiri kiuj el la 28 ili kredas eniros la finalon. Ili avide aŭskultas kaj spektas la kantojn ĉe Eurovision 2007.

Se vi volas ankaŭ sendi viajn antaŭdirojn por la duonfinalo, bonvolu (al sprigofheather2002 ĉe yahoo.co.uk)! Antaŭdirojn por la finalo ni ĉiuj devos fari vendredon la 11-an de majo.