Pages

02/02/2009

Neĝo

Hodiaŭ en Britio multe neĝis. Nu, kiam mi diras 'multe neĝis, mi volas diri 'multe' laŭ britaj normoj. Krom en la montaraj regionoj, sufiĉe malmulte neĝas kutime, do kiam falas kelkaj neĝflokoj, estas granda ekscitiĝo.

Hieraŭ oni prognozis neĝon por ĉiuj. Kiam mi vekiĝis mi tuj rigardis tra la fenestro. Nenio! Kvankam neĝis preskaŭ ĉie ajn en Britio, en suda Kimrio eĉ ne floko! Mi devis, tial, kiel kutime ellitiĝi kaj iri al la laborejo (kia seniluziiĝo!)
Alie, tamen, la neĝo ja kaŭzis sufiĉe da problemoj. Ĉar ni ne alkutimiĝas al multe da neĝo, ni ne havas la necesan infrastrukturon alfronti eĉ kelkajn centimetrojn.

En Londono (kie neĝo ne estas ofta) la konataj ruĝaj Londonaj aŭtobusoj ne funkcias hodiaŭ. En la tuta sudorienta parto de Britio estas preskaŭ neniuj trajnoj, busoj, aviadiloj ktp. (La jenaj bildoj montras sud-orientan anglion) Oni diras ke morgaŭ la neĝo ankaŭ frapos nin ĉe Kardifo. Eble, post ĉio, mi povos resti varme en mia domo.

26/01/2009

Mia tago 3

15.30 Mi iom freneziĝas pro la amaso da aĵoj kiujn mi devas legi rilate al tiu ĉi 'verdaj laborlokaj' iniciato (kiun mi priskribis en mia lasta blogaĵo.)

16.00 Retmesaĝo de mia franca amikino kiu loĝas apude. Ni decidas renkontiĝi venontan merkredon por kune vespermanĝi kaj babiladi. Bone.

16.30 Post nur 30 minutoj mi povos reiri hejmen - hura! Plaĉas al mi mia laboro, sed plej plaĉas al mi mia libertempo!

17.30 Laŭvoje hejmen mi aĉetas kelkajn manĝaĵojn ĉe la supermerkato Lidl. Mi iom babiladas kun la kasisto pri lokaj novaĵoj. La kasistoj tie estas ĉiam tre helpemaj kaj simpatiaj.

18.30 Mi babiladas per telefono kun amikino mia. Ni aranĝas ferieton en septembro kiam ni intencas festi la 70-an datrevenon de ŝia patrino kun semajnfina libertempo ie...

19.00 Mi manĝas pizza-on. Bongustega! Mi estas laca, do mi decidas spekti filmon per DVD. Mi elektas la franclingvan filmon 'Hors de Prix' [Netaksebla]. Amuze kaj distre.

21.00 Mi kontrolas miajn retmesaĝojn kaj respondas al kelkaj.

21.30 Mi decidas enlitiĝi kaj legi dum iom da tempo. Mi legas verkaĵon pri vojaĝo bicikle trans Suda Ameriko. Tre interese.

22.30 Laca. Mi malŝaltas la lumon kaj iom aŭskultas la radion antaŭ ol endormiĝi.

Mia tago 2

12.20 Kolegaj 1 kaj 2 faras la 'futbalan demandaron' kiu ĉiutage aperas ĉe la retejo de brita ĵurnalo. Ne interesas min futbalo. Mi neniam scias la respondojn al la demando. Tamen, por senti min vere parto de la 'futbala konversacio', mi kutimas noti iliajn rezultojn en tiu ĉi demandaro per grafikaĵo. La rezultoj estas por 10 demandoj. Ĝis nun, neniu gajnis dek poentojn! Hodiaŭ ili gajnis nur kvar.
12.30 Kolego 1 foriras al kunsido kun iu kiu interesas en la laboro de nia kompanio. Kolego 2 resumas politikajn novaĵojn.

12.45 Mi decidas eliri iom marŝi dum mia lunĉhoro. Ne plu pluvas do estas bona okazo enspiri freŝan aeron.

13.30 Mi marŝis en la parko kaj faris kelkajn fotojn, kiujn mi intencis montri ĉi tie. Mi rimarkas, tamen, ke mi uzis malpravan butonon sur mia fotoaparato kaj ĉio fuŝiĝis. Mi malofte faras tiajn stultaĵojn. Mi ne bone rimarkis kion mi faris ĉar mi samtempe aŭskultis sondosieron de la libro 'Walden' [ualden] de la usona verkisto Thoreau [prks. toroŭ]. Kvankam mi bone konas anglan literaturon, mi malmulte legis usonan literaturon en la angla lingvo. Kelkfoje mi klopodis legi la verkaĵon 'Walden' sed trovis ĝin malfacile. Anstataŭe mi trovis sondosieron de la libro kaj aŭskultas ĝin kiam mi marŝadas. Mi trovas ke estas pli facile pripensi liajn vortojn tiel.

13.45 Post lunĉo de pano kaj funga supo, mi rekomencas labori. Dum la posttagmezo mi intencas legi rekomendojn pri 'verdaj laborlokoj'. Ne, tio ne estas laborlokoj kie oni parolas Esperanton, sed laborejon kie oni klopodas saĝe uzi la terrimedojn kaj ne malŝparu energion, paperon ktp.

Mia Tago 1

Dum iom da tempo mi malmulte verkis ĉi tie. Nenio tre interese okazis/okazas. La vintraj tagoj de januaro similas unu al la alia. Eble, tamen, ili ne similas al viaj tagoj.

Hodiaŭ, do, mi simple priskribos mian tagon:

06.45 Mi vekiĝas. Apud mia lito mi havas kafmaŝinon, do mi povas rapide fari mian matenan kafon kaj sidas en mia lito ĝin trinkante. Mi aŭskultas la novaĵon per la radio.

07.10 Mi ellitiĝas, prenas duŝon kaj vestas min. Mi decidas porti la nigran jupon kun verda pulovero. Pro la pluvo mi ne povos porti miajn belajn novajn ŝuojn, kiun estas faritaj el teksaĵo. Ha! Mi trovis solvon. Mi portos botojn laŭvoje, kaj surmetos miajn ŝuojn alveninte al la oficejo.

07.30 Mi faras mian matenmanĝon - avena kaĉo kun oksikokoj, vinberoj kaj abrikotoj. Mi trinkas oranĝan sukon. Poste mi finpreparas min kaj forlasas la domon.

08.15 Pluvas kaj ankoraŭ estas mallumeta. Mi piediras al la laborejo. Jen mia vojaĝo:

Pro la pluvo hodiaŭ estas multe da trafiko (multaj personoj ŝajne decidis veturi per aŭto al la laboro por ne malsekiĝi). Ne estas facile transiri la vojon.

Post 45-minuta marŝado mi alvenas al la konstruaĵo kie troviĝas mia oficejo. La konstruaĵo estis, pasintece, granda domo por riĉa familio. Nun la diversaj ĉambroj estas oficejoj. Nia kompanio luas unu el la oficejoj ĉe la dua etaĝo.09.00 Ĉe la oficejo mi faras duan kafon (sen kafeino ĉi-foje)



Mi kontrolas miajn retmesaĝojn kaj respondas laŭnecese.

09.30 - Mi legas la ĵurnalojn: Western Mail [ŭesten mejl] kiu estas la ĵurnalo por Kimrio; Morning Star [monin sta - matena stelo] kiu estas maldekstreca ĵurnalo enhavante informojn pri la sindikata movado; kaj Financial Times [fajnanŝal tajmz] kiu enhavas ekonomiajn kaj komercajn novaĵojn. Necesas ĉion legi por ĝisdatiĝi pri la ekonomia kaj politika situacio

10.00 - Mi legas retajn novaĵojn el kelkaj landoj por ĝisdatiĝi pri eŭropaj kaj mondaj novaĵoj.

10.15 - Mi kontrolas la retejon de la nacia asembleo por Kimrio. Dum la mateno mi legos la lastatempajn politikajn evoluojn kaj informos nian klientaron (la komercaj instancoj kaj sindikatoj de Kimrio) pri io kiu estos interesa/utila por ili.

11.00 Mi bezonas pli da kafo! Mi prenas 10-minutan paŭzon kaj lernas mian frazon en la hispana por la tago. Mi havas kalendaron kiu donas unu frazon po tago. Mi klopodas lerni la hispanan kaj estas tre helpa metodo lerni pli da vortoj. La hodiaŭa frazo estas 'Necesito mis guantes' - Mi bezonas miajn gantojn. Tre taŭga frazo por hodiaŭ, ĉar estas malvarme.

11.30 Kolegoj 1 kaj 2 havas longan diskuton pri la japana lingvo. La filino de Kolego 2 studas la japanan ĉe la universitato, do Kolegoj 1 kaj 2 klopodas lerni kelkajn frazojn.

Pli pri mia tago poste...

16/12/2008

pli da bildoj de Tulono

Kiam ajn mi vizitas Francion, estas ĉiam plezuro rigardi la merkatojn kie kutime estas multe pli bona elekto da produktoj ol ĉehejme. Supre estas vinberoj kaj kaŝtanoj. Sube multaj diversaj fungoj allogas.

Mi faris per-boatan rondiron de la haveno. Jen la ŝipo Charles de Gaulle [pr. ŝarl de gol] kiu estas la sola aviadila ŝipo nuntempe en la franca mararmeo.


Je la alia flanko de la golfo de Tulono estas diversaj belaj vilaĝoj:



Jen unu el la antaŭ-urboj de Tulono, kiu nomiĝas Bazeilles [pr. bazej].

Kaj sube estas panoramoj sur Tulono de la maro.



vizito al Tulono

Lastatempe ĉio en Britio ŝajnas esti iom griza: la vetero, la stratoj, la ekonomio, la humoro de la enloĝantoj... Ĉiuj ŝajne maltrankviliĝas pri la ekonomia krizo. Oni maltrankviliĝas ke estas tiom farenda antaŭ la kristnaskaj/jarfinaj festoj. Oni maltrankviliĝas pro la pluvo, la manko da taglumo, la malvarma vetero. Kiam grizas la etoso, plaĉas al mi spekti fotojn de belaj lokoj kiujn mi vizitis. Tial, hodiaŭ anstataŭ blogi pri la ekonomio, la vetero, ktp, mi montros al vi kelkaj fotoj de mia vizito al Toulon [pr. tulon] kiu en Esperanto estas foje nomita Tulono. Tulono estas urbo en suda Francio kun plaĉa haveno. Estas la militŝipa bazo por la Franca mararmeo. Mi vizitis la urbon en frua oktobro kun la gepatroj de amikino. Ni forlasis kimrion je pluva tago kaj eltrajniĝis sub bela, varma sunbrilo.

Jen la panoramo de la balkono de mia hotelĉambro:



Ni iom ripozis nin, tiam hastis al trinkejo en unu el la belaj placoj, kie mi trinkis glason da pastis [pr. pastis], t.e. aniza alkoholaĵo.

Pli da bildoj baldaŭ...

04/12/2008

Les Eason 27.04.1927 - 04.12.1998

La 4-an de decembro 1998, do antaŭ precize dek jaroj, mia kara patro mortis. Li havis 71 jarojn.

Estinte en la mararmeo dum la dua mondmilito, la deziro de mia patro estis ke post la morto liaj cindroj esti disĵetitaj sur la maro je la matena tajdo. Tiun deziron ni respektis. Tial ne estas tombo kie mi hodiaŭ povus kliniĝi respekte al mia paĉjo. Anstataŭe, mi rigardos al la maro kaj pensos pri li.

Ĉiuokaze, mi preferas memori mian patron vivante - ĉe Esperanto-kunsidoj, farante magion (li estis prestidigitisto), parolante pri multaj diversaj temoj, deklamante poezion...

Mia patro (kiel ĉiuj gepatroj) ne estis perfekta. Sed, li estis mia paĉjo kaj kompreneble havis grandegon influon sur mia vivo... kaj li mankas al mi. Dum dek jaroj nun mi ne havis la oportunon paroli kun li - mi tamen ofte pensas pri li kun amo kaj respekto. La ĉi-kunaj fotos montras, ĉi-supre, mian patron farante magion en la jaro 1955 kaj, sube, lin kun mi en 1970.

Fervora Esperantisto, estas taŭga ke mi ĉi tie starigu memoraĵeton pri li hodiaŭ en Esperantio.

Unu el la Esperantaj kantoj kiun mia patro plej ŝatis estis La Tagiĝo de Antoni Grabowski. Li foje estis iom idealisma kaj plaĉis al li la metaforo pri lumo. Mi lasu vin, do, kun kelkaj linioj el tiu kanto, memore al Paĉjo:

Tagiĝo, tagiĝo radias en rond',
La ombroj de nokto forkuras el mond'!

Printempo alvenas!

Kunloĝantoj en la norda hemisfero, ĉu ne januaro ĉijare estis unu el la plej longaj monatoj de via vivo ankaŭ? Malbona vetero, senluma ĉielo...