Pages

15/05/2006

semajnfina sporto

La pasinta semajnfino estis iom sporta ĉe Kardifo. Sabaton okazis la finalo de la ĉampionado de la Futbala Asocio ĉe la Jarmila Stadio [Millennium Stadium]. Kolegoj 1 kaj 2 ne ĉesis diskutadi la maĉon ĉi-matene (dum mi dormetis!)

La plej grava sporta evento por ni en la oficejo, tamen, okazis dimanĉon kiam unu el la filoj de Kolego 1 havis la oportunon ludi rugbeon kun sia infana teamo en la Jarmila Stadio mem, do sur la sama gazono kiel la maĉego de la antaŭa tago.

Mi pensis ke tio, do, meritis esti menciita en mia hodiaŭa blogo. Jen, do, bildoj pri Llandaff 'Malpli ol Ok Jaroj' kontraŭ Barry. La infanoj aspektas tiom malgrandaj en tiom granda stadio, ĉu ne?

La filo de mia kolego montriĝas per ruĝa kvadrato. Feliĉe lia teamo gajnis!



09/05/2006

okcidentkimran semajnfinon

Mi pasigis la semajnfinon en sudokcidenta Kimrio ĉe geamikoj kiuj posedas mielejon tie. Ili havas abelojn kaj produktas mielon, sed ilia specialaĵo estas bongustega miela glaciaĵo. Tiuj kiuj scipovas la anglan povas legi pli ĉe Brynderi Honey Farm.

Jen kelkaj bildoj kiuj montras la domon kaj mielejon kaj ankaŭ la panoramon de antaŭ la domo.


Dimanĉon ni vizitis la ĝardenojn Aberglasney. Mi scias ke mi multe montris al vi fotojn de ĝardenoj, plantoj ktp. lastatempe - jen, tamen, kelkaj pli. La ĝardenojn estas restaŭritaj dum la pasintaj kelkaj jaroj kvankam la ĝardeno ekzistas ekde la 15-a jarcento. La domo estas ankoraŭ nur parte restaŭrita - oni diras ke estas fantomoj en kaj la domo, kaj la ĝardeno!



Kaj jen kelkaj fotoj pri la arbaro malantaŭ la ĝardenoj:


26/04/2006

kaj pli da tulipoj...

Estas varma kaj suna printempa tago ĉi tie en Kardifo - mi decidis manĝi mian lunĉon en la apuda parko. Remarŝante al la laborejo mi faris kelkajn fotojn:



Ankaŭ en tiu parko estas multaj belaj arboj kaj verdaĵo.





Apud la vojeto, ĝardenartisto estas farinte 'naturskulptaĵon' (ĝi montras virporkon) el herbo, ligno kaj plantoj:



tulipoj

Tulipoj estas miaj plej ŝatataj floroj. Tial, ĉiu jare mi plantas multajn tulipojn en mia ĝardeno. Hieraŭ mi fotis miajn belajn blankajn tulipojn por montri al vi. (Ankaŭ mia ĝardena gnomstatueto!)

21/04/2006

Elizabeto la lasta?

Hodiaŭ la Reĝino Elizabeto la Dua festas ŝian 80-an naskiĝdatrevenon. Kompreneble, la amaskomunikiloj estas plenaj je bildoj, historiaj faktoj, debatoj kaj tiel plu. Elizabeto la Dua estas reĝino de la Uniĝinta Reĝlando kaj la eksterlandaj posedaĵoj de Britio ekde 54 jaroj. Ĉiutage ni vidas ŝian siluton sur niaj moneroj, bankbiletoj kaj poŝtmarkoj. Hodiaŭ, do, okazos diversaj festaĵoj por la reĝino ĉe ŝiaj kasteloj kaj palacoj kaj ĉi-vespere artfajraĵoj ĉe la Palaco ĉe Kew. Laŭdire, la reĝino jam ricevis 20,000 bondezirkartojn kaj 17,000 retmesaĝojn.

Multaj personoj, tamen, debatas ĉu monarkio estas ankoraŭ bona ideo. Kvankam ni havas laŭdire neŭtralan, konstitucian monarkion, la reĝino estas daŭre la Ĉefo de la Ŝtato. La ĵurnalo Guardian hodiaŭ komentas ke Ŝtatĉefo estas ĉiam simbolo de nacio kaj ke la reĝino estas blanka aristokrato eliktita nur pro ŝia sango. (Tiuj kiuj scipovas la anglan eble interesos legi la plenan artikolon ĉi tie.) En Britio, eĉ se oni estas la plej lerta, ĉarma, vigla, laborema individuo, oni neniam povas atingi la plej altan postenon en la lando se oni ne havas la ĝustan 'bluan' sangon en sies vejnoj.

La Brita politikisto Tony Benn [toni ben] iam diris ke ni ne fidus piloton kiu anoncus per laŭtparolilo "Fakte, mi ne trejniĝis kiel piloto, tamen ne ĉagreniĝu - mia patro ja tion faris." Post la nuna reĝino, devus heredi la princo Karolo, ne tre populara reĝa familiano. Multaj opinias ke la nuna reĝa ŝtatĉefo devus esti la lasta.

Ĉu mi esperas ke 80-jara virino, kiu laŭdire multe laboras, havos feliĉan tagon? Jes. Ĉu mi preferus havi eblecon elekti ŝtatĉefon? Kompreneble.

18/04/2006

ferieto

Pro la Paskaj festoj mi havis 4-tagan semajnfinon, kiu estis tre agrable. Mi vojaĝis al la urbo Bicester kie mi pasigis kelkajn tagojn kun mia frato kaj lia koramikino. Rete ni estis trovintaj tre malmultekosta oferto por hotelo ĉe Bicester kaj ĉar tiu urbo estas preskaŭ mezdistance de mia domo, kaj de ilia domo, ni decidis tie renkontiĝi.

Jen, do, kelkaj bildoj pri nia ferieto.


Apud la urbo Bicester estas tiel nomita 'desegnista vilaĝo'. Tio estas aro da butikoj kie konataj mod-desegnistaj kompanioj vendas varojn malmultekostajn (aŭ, almenaŭ pli malmultekostajn ol kutime!)




Jen nur kelkaj el la markoj kiuj vendas ĉe Bicester.

Sabaton ni decidis viziti Oksfordon. Mi jam sufiĉe bone konas tiun belan urbon kaj estis plezuro revidi ĝin. La bildo ĉi-sube amuzis min. Kiel vi vidas, la konstraĵo estas tre malnova, sed la butiko kiun ĝi enhavas, tre moderna!


Jen kelkaj aliaj belaj Oksfordaj konstruaĵoj:

Ankaŭ en Oksfordo ni vizitis la botanikan ĝardenon:

En la varmforcejo la lenso de mia fotoaparato komplete vaporkovriĝis. Oni malofte vidas bananojn kreskantajn en Britio!


Kaj jen, finfine, la panoramo el mia hotelĉambra fenestro:

06/04/2006

fermotaj lernejoj

Amiko Lŭisgiĵermo demandis min en komento ĉi-sube pri novaĵo raportita ke multaj lernejoj en mia urbo baldaŭ fermiĝos.

Fakte, jes, oni anoncis antaŭ du tagoj ke en Kardifo, baldaŭ 17 lernejoj fermiĝos (11 elementaj lernejoj kaj 6 gimnazioj).

La kialo (oficiale) estas ke la loĝantaro iom falis kaj, do, estas tro da liberaj lernejspacoj. La konsilantaro de Kardifo decidis fermi iujn lernejojn kaj uzu la ŝparita mono plibonigi la ceterajn lernejojn. Nuntempe estas 16% da liberaj spacoj en la lernejoj kaj oni prognozas ke tio estos 25% en 2017.

Kompreneble, estas problemoj kun tiu decido... ĉu tio signifas ke instruistoj perdos siajn postenojn? Verŝajne infanoj devos ĉeesti lernejon pli for de iliaj hejmoj. Ĉu finfine oni investos malpli da mono en la edukada sistemo?

Mi legis en la ĵurnalo ke la elementa lernejo kiun mi ĉeestis (ĉi-supre) estas unu el tiuj kiuj fermiĝos. Plaĉis al mi tiun lernejon (komplete malplaĉis al mi ĉiun alian lernejon kiun mi ĉeestis) do mi iom bedaŭras pro tio.

Printempo alvenas!

Kunloĝantoj en la norda hemisfero, ĉu ne januaro ĉijare estis unu el la plej longaj monatoj de via vivo ankaŭ? Malbona vetero, senluma ĉielo...