Pages

01/03/2006

kimraj regimentoj

Post la oficiala malferma ceremonio de la Kimra Asemblea konstruaĵo ĉi-matene (kiun mi menciis en mia antaŭa blogo - bildojn vi povas vidi ĉe la BBC) la Gardistoj marŝis de la marborda kvartalo al la urbocentro.

Tute hazarde (ĉar mi ne sciis ke okazus) mi troviĝis en la ĉefstrato kiam ili alvenis. Mi kunhavis mian fotilon - mi uzis ĝin foti la neĝon ĉi-matene - do mi faris kelkajn bildojn kiuj eble interesos al vi.

Fakte, la regimento kiu marŝas estis, ĝis meznokto hieraŭ, du regimentoj kiuj tiam kuniĝis. La Reĝaj Kimraj Fusilantoj kaj la Reĝa Kimra Regimento nun nomiĝas la Reĝa Kimra.

La talismano de la antaŭa Kimra Regimento, kaj nun de la Reĝa Kimra, estas kapro, tial vi vidas 3 kaprojn en la fotoj.

















pli da neĝo

Jen bildo de mia ĝardeno ĉi-matene. Mi surpriziĝis kiam mi vekiĝis kaj konstatis ke neĝo estis falinta dum la nokto. Oni ja prognozis neĝon por okcidenta kimrio, sed ni ne atendis ĝin en Kardifo. Tial la vojoj ne estis salintaj kaj la aŭtoj devis malrapide veturi. Mia 45 minuta marŝado al la laborejo estis danĝereta ĉar la trotuaroj estis glitaj, sed la neĝo estis bela. Laŭvoje al la oficejo komencis neĝi denove kaj la dua bildo montras mian vojon kun la falanta neĝo.

Hodiaŭ estas la Tago de Sankta Davido, la patrona sanktulo de Kimrio. Tradicia manĝaĵo por la tago estas kimraj kukutoj plene je sekvinberoj kaj spicoj, supo, poreoj.

Ankaŭ hodiaŭ la Reĝino Elizabeto la Dua venos al Kardifo oficiale malfermi la novan Asemblean konstruaĵon (vidu mian blogon de la 7a de februaro). Mi tamen ne intencas marŝadi tra la neĝo ŝin vidi.

23/02/2006

briteco

Lastatempe en Britio, oni multe diskutis pri 'briteco'. Ĉu ni devus plifortigi nian sperton de briteco. Fakte, David Bisset tre interese blogis pri ĉi tiun diskuton ĉe Kulturo en Skotlando. Oni ankaŭ diskutas pri 'ikonaj simboloj' de briteco: ruĝa Londona aŭtobuso, konataj konstruaĵoj, pudingon, 'britan' tason da teo kun lakto.

Mi mem sentas ian lojalecon al Kimrio, kie mi naskiĝis kaj kreskiĝis. Mi havas ĝeneralan korinklinon pri la kuriozaĵoj de la vivo kaj kulturo en Britio. Tamen tre granda influo sur mi ankaŭ estis kaj estas la internacieco de la Esperanto movado. Plej gravas por mi la similecojn inter homoj ol la malsimilecojn inter kulturoj kaj nacioj.

Hieraŭ mi trovis amuzan eron senditan al la retejo de la BBC:

Esti brita: veturi en germana aŭtomobilo al irlanda trinkejo, trinki belgan bieron, tiam vojaĝi hejmen, laŭvoje aĉeti hindan manĝaĵon, hejme sidi sur svedaj mebloj kaj rigardi usonajn programojn per japana televido.

Kaj la plej brita trajto? Suspekti ĉion eksterlandan.

09/02/2006

interesaj prauloj

Interesas min historio. Aparte socia historio. Tial, mi ekde juna aĝo interesiĝis pri la historio de mia familio.

Mi estas de familio kie oni ofte rakontis historietojn pri la prauloj. Mi kreskiĝis sciante kiuj estis miaj gepraavoj, kion ili faris, kiel ili loĝis. Lastatempe, tamen, mi iom esploradas pli frue en la familiajn radikojn.

Aktuale en Britio, estas interesego pri genealogio, plejparte pro kelkaj televidprogramserioj en kiuj steluloj esploras sian familian historion.

En la jena foto vi vidas mian praavon, James Rees BOWDEN (ĝejmz ris baŭden) kiu vivis de 1857 al 1917. Lia patro, William (Vilhelmo) venis al suda Kimrio al Kardifo de la graflando Devon en sudokcidenta anglio dum la 1840aj jaroj. Vilhelmo laboris kiel tornisto ĉe ŝipfarejo. Dum la 1840aj jaroj, oni konstruis fervojojn al Devon. Sekve, estis malpli da ŝipfarado - produktoj plej ofte transportiĝis enlande per trajnoj anstataŭ per ŝipoj. Tial, Vilhelmo translokiĝis kun sia edzino al Kardifo, kie internacia markomercado en karbo prosperis kaj li sukcesis trovi laboron.

James edziĝis kun Elizabeth en la jaro 1883 kaj ili havis almenaŭ 12 infanojn, inkluzive mian avinon.

07/02/2006

nova hejmo por politikistoj en Kimrio

Hieraŭ, politikistoj en Kimrio ekdebatis en nova konstruaĵo. La Senedd (kimra vorto kiu signifas parlamentejo) troviĝas en la marborda distrikto de Kardifo.

Ekde 1997 kiam stariĝis la Kimra Nacia Asembleo, la politikistoj projekciis novan konstruaĵon kaj finfine, hieraŭ, okazis ilian unuan plenkunsidon en la nova debatĉambro. La Kimra Asembleo havas leĝdonpovon por Kimrio en kelkaj diversaj influsferoj, kvankam multaj el la leĝoj estas ankoraŭ faritaj far la Brita Parlamento en Londono.

La Brita Reĝino oficiale malfermos la konstruaĵon la 1-an de marto.

Estas interesa konstruaĵo kiu enhavas diversajn energiŝparajn elementojn. Ekzemple, la debatĉambro estas lumigita per natura taglumo pre aranĝitaj speguloj. (Estos interese vidi ĉu tiu sistemo bone funkcios sub la griza januara ĉielo en Kimrio).

Pluvakvo (kiun ni abunde havas en Kardifo) oni kolektas sur la tegmento kaj uzas por ĉio krom trinkado. Akvotuboj estas profunde enterigitaj kaj dum la vintro, la tervarmeco varmigas la akvon. Ja estas tre interese kaj mi esperas baldaŭ viziti la ejon.

23/01/2006

perdita baleno

Pasintan vendredon estis nekutima vidaĵo en Londono. Botelnaza baleno (kiuj kutime naĝas en la profunda maro) perdiĝis kaj trovis sin en la Rivero Tamizo en centra Londono. Sekvis longdaŭraj klopodoj savi la balenon kaj redirekti ĝin al la maro dum homamaso spektis de la riverbordo.

Tre bedaŭrinde, sabaton vesperon, la baleno mortis en barĝo laŭvoje al la maro. Verŝajne la traŭmo estis tro granda por ĝi.

Spertuloj de la Londona Zoologia Societo nun faras aŭtopsion kaj esperas malkovri kial la baleno tiom katastrofe perdiĝis.

03/01/2006

2006

Feliĉan novan jaron (iom malfrue) al ĉiuj!

Post restado ĉe la domo de mia patrino por Kristnasko, mi vojaĝis hejmen la 28-an de decembro kaj festis la novan jaron ĉe mi. Hodiaŭ, tamen, mi estas denove ĉe la laborejo, do ĉio nun estas kiel kutime. Nu, preskaŭ kiel kutime - bedaŭrinde ĉi-matene mi devis viziti la dentiston ĉar hieraŭ mi perdis dento-plombon. Feliĉe, mia dentisto povis doni al mi rendevuon hodiaŭ kaj refaris la plombon. Unu flankon de mia buŝo mi ankoraŭ ne povas movi pro la anestezilo! Tio ne estis tre aŭspicia komenco al la nova jaro - mi intencis elspezi monon aĉetante novajn vestaĵojn anstataŭ dentistajn servojn!

Nu, mi esperas ke 2006 komenciĝis bone por ĉiuj kaj ke estos jaro plene da feliĉo kaj paco.

Printempo alvenas!

Kunloĝantoj en la norda hemisfero, ĉu ne januaro ĉijare estis unu el la plej longaj monatoj de via vivo ankaŭ? Malbona vetero, senluma ĉielo...